Presidenti i Shteteve të Bashkuara, Donald Trump, hodhi poshtë shqetësimet e Izraelit lidhur me një shitje të mundshme të aeroplanëve luftarakë F-35 Turqisë, duke deklaruar se vendimet për eksportin e armëve amerikane i merr vetëm ai.
Komentet e Trump erdhën pas raportimeve se kryeministri izraelit, Benjamin Netanyahu, ka shprehur kundërshtimin e tij ndaj mundësisë që Turqia të pajiset me avionët e avancuar F-35.
“Ai është një mik i imi dhe askush nuk më tregon se çfarë duhet t’i shesim”, tha Trump, duke iu referuar presidentit turk Recep Tayyip Erdoğan. Ai shtoi se Turqia ka qenë një “aleat i jashtëzakonshëm” i Shteteve të Bashkuara.
Më herët gjatë këtij muaji, Trump deklaroi se administrata e tij po shqyrton mundësinë e lejimit të shitjes së avionëve F-35 Turqisë, megjithëse një veprim i tillë aktualisht pengohet nga legjislacioni amerikan, për shkak të blerjes nga Ankaraja të sistemit rus të mbrojtjes ajrore S-400.
Presidenti amerikan pranoi gjithashtu se “Turqia nuk është një fanse e madhe e Izraelit”, duke nënvizuar dallimet mes dy vendeve.
Trump, i cili pritet të zhvillojë një takim me Benjamin Netanyahun në Uashington gjatë kësaj jave, tha se ai dhe kryeministri izraelit janë pothuajse në një linjë sa i përket çështjes së Iranit, megjithëse ekziston “një ndryshim i vogël” mes tyre.
“Kemi një ndryshim të vogël, por në përgjithësi jemi shumë afër”, u shpreh Trump.