Sekretariati i Etikës në Kuvend do të mblidhet të martën, më 28 korrik, për të shqyrtuar kërkesën e Partisë Socialiste për përjashtimin e deputetit dhe kreut të Partisë Mundësia, Agron Shehaj.
Mbledhja është parashikuar të nisë në orën 09:30 dhe në rend dite është edhe kërkesa për referimin e çështjes pranë Prokurorisë së Posaçme (SPAK).
PS ka kërkuar marrjen e masës disiplinore ndaj Shehajt pas publikimit të një videoje, ku deputeti shfaqej duke marrë një kopje të marrëveshjes së huasë mes Shqipërisë dhe Shteteve të Bashkuara të Amerikës në fushën e mbrojtjes.
Në kërkesën e depozituar në Kuvend, socialistët kërkojnë që Shehaj të përjashtohet nga pjesëmarrja në komisione parlamentare dhe seanca plenare për një periudhë 60-ditore.
Sipas Partisë Socialiste, deputeti ka nxjerrë nga salla e Kuvendit një dokument që përmban informacion të mbrojtur me ligj, duke pretenduar se është shkelur legjislacioni për informacionin e klasifikuar.
Nga ana e tij, Shehaj ka kundërshtuar akuzat dhe ka deklaruar se veprimi i tij lidhej me transparencën ndaj publikut.