Shpëtimi i rreth 25,000 ushtarëve italianë nga familjet shqiptare pas kapitullimit të Italisë në vitin 1943 dhe mbërritjes së forcave naziste në Shqipëri, një ngjarje historike që ka mbetur pothuajse e panjohur për më shumë se 80 vite, po rikthehet në vëmendje falë dokumentarit të realizuar nga gazetarja Rudina Xhunga.
Në një intervistë për gazetaren Xhunga, kryeministri Edi Rama tha se edhe ai u njoh për herë të parë me dimensionin e plotë të këtij fakti historik falë punës së gazetares.
“Kjo histori vjen në vëmendjen tonë, edhe timen, falë teje, sepse nuk është një histori që është përfolur shumë”, u shpreh Rama.
Ai shtoi se ndërkohë që italianët shpesh portretizoheshin si figura “gjysmë qesharake” në filma si Njeriu me top, në realitet 25,000 ushtarë ishin në nevojë dhe u shpëtuan nga shqiptarët. Rama kujtoi edhe reagimin e kryeministres italiane, Giorgia Meloni, e cila u prek nga kjo ngjarje, pasi shumica e italianëve nuk e dinë këtë histori.
Rama vuri në dukje se edhe për shqiptarët, kjo pjesë e historisë nuk është trajtuar si një moment krenarie.
“Ajo nuk është treguar me detaje dhe ka marrë formë më shumë pas shembjes së komunizmit. Duhet të pyeten ata që kanë shkruar librat në kohën e komunizmit se përse e kanë anashkaluar këtë pjesë”, tha ai.
Kryeministri e konsideroi këtë akt humanizmi si një nga dy momentet më krenare të historisë shqiptare, krahas shpëtimit të hebrenjve gjatë Luftës së Dytë Botërore.
Rama përgëzoi Rudina Xhungën për përpjekjet e saj dhe bëri një kërkesë publike ndaj ministrit të Jashtëm italian, Antonio Tajani, për të ndihmuar që filmi të shfaqet në Parlamentin Italian, në mënyrë që kjo dëshmi e miqësisë dhe humanizmit midis shqiptarëve dhe italianëve të bëhet e njohur për të gjithë.