Kryeministri Edi Rama deklaroi se qeveria do të përmbyllë brenda këtij viti fazën konceptuale të projektligjit për “Paqen Fiskale”, ndërsa zbatimi i saj pritet të nisë në fillim të vitit 2026.
Gjatë një takimi me ekspertë të ekonomisë dhe financave, Rama theksoi se nisma është një nga prioritetet kryesore të qeverisë në kuadër të përgatitjeve për anëtarësimin e Shqipërisë në Bashkimin Evropian deri në vitin 2030.
“Është thelbësore që ‘Paqja Fiskale’ të hartohet dhe të përfundohet në mënyrë të plotë deri në fund të këtij viti, për të garantuar një zbatim të suksesshëm që nga fillimi i 2026-s,” u shpreh kryeministri.
Sipas Ramës, kjo nismë synon të krijojë një mjedis më të qëndrueshëm dhe të parashikueshëm për biznesin, duke dhënë një sinjal pozitiv për sipërmarrjen dhe duke ndihmuar në rritjen e të ardhurave buxhetore.
Kreu i qeverisë nënvizoi gjithashtu se “Paqja Fiskale” do të shërbejë për përmirësimin e performancës së administratës publike dhe për uljen e nivelit të informalitetit në ekonomi, në funksion të një klime më të favorshme për investime.
Nga ana e tij, ministri i Financave, Petrit Malaj, e përshkroi politikën e re fiskale si një bazë për zhvillim të qëndrueshëm ekonomik, duke theksuar rëndësinë e ekuilibrit mes disiplinës buxhetore, reformave strukturore dhe investimeve strategjike.
“Qëllimi ynë është i qartë dhe ambicioz: përmes politikave të shëndosha fiskale e monetare dhe reformave të thella strukturore, ekonomia shqiptare do të hyjë në një fazë të re të qëndrueshme zhvillimi,” tha ministri Malaj.