Kryeministri Edi Rama mori pjesë në organizimin e 35-vjetorit të PS-së në Elbasan, ku në fjalën e tij u ndal te rëndësia e investimeve në turizmin e luksit dhe ndikimi i tyre në ekonominë e vendit.
Në nisje të fjalimit, Rama iu drejtua një personi që mbante një parullë kundër projektit në Zvërnec, duke kërkuar që ajo të ulej dhe të mos shfaqej gjatë aktivitetit.
Më pas, kryeministri solli si shembull zhvillimin e Malit të Zi, duke theksuar se disa projekte investimi që sipas tij janë refuzuar në Shqipëri, kanë sjellë përfitime të mëdha në vendin fqinj.
Ai përmendi projektin “Porto Montenegro” në Tivat, duke argumentuar se investime të tilla kanë transformuar ekonominë lokale dhe kanë rritur ndjeshëm turizmin, punësimin dhe të ardhurat.
Sipas Ramës, turizmi i luksit nuk është i shkëputur nga ekonomia vendase, por përkundrazi ndikon drejtpërdrejt në rritjen e konsumit, zhvillimin e shërbimeve dhe fuqizimin e sektorëve si bujqësia dhe tregtia.
“Ne çfarë jemi? Jemi budallenj që të shohim se si të tjerët i marrin mundësitë që ne i lejojmë të na rrëshqasin?”, u shpreh Rama në përmbyllje të deklaratës së tij.