Vladimir Alekseyev, një nga figurat më të larta të inteligjencës ushtarake ruse, u qëllua me armë zjarri më 6 shkurt në Moskë, në një incident që ka rritur tensionet mes Rusisë dhe vendeve perëndimore.
Gjeneral-lejtnanti 64-vjeçar, i cili mban postin e zëvendëskreut të GRU, u sulmua brenda një ndërtese banimi në kryeqytetin rus. Ai mbeti i plagosur rëndë dhe u dërgua me urgjencë në spital. Sipas burimeve zyrtare ruse, gjendja e tij është stabilizuar dhe pritet të mbijetojë.
Reagimi më i fortë erdhi nga kreu i FSB, Alexander Bortnikov, i cili deklaroi se pas atentatit qëndrojnë shërbimet speciale ukrainase, duke pretenduar se ato veprojnë nën mbikëqyrjen e inteligjencës perëndimore.
“Ne e kuptojmë qartë se organizatorët janë shërbimet speciale ukrainase. Dhe pas tyre qëndrojnë vende të treta… Ne shohim një gjurmë britanike mbi të gjitha këtu. Hetimi po vazhdon,” u shpreh Bortnikov.
Zyrtarët rusë kanë ngritur edhe më herët akuza ndaj shërbimeve perëndimore për përfshirje indirekte në operacione kundër interesave të Moskës, por kjo deklaratë konsiderohet si një nga akuzat më të drejtpërdrejta ndaj Britania e Madhe për një incident të ndodhur në territorin rus.
Deri më tani nuk ka pasur reagim zyrtar nga Londra lidhur me pretendimet e ngritura nga pala ruse.
Autoritetet kanë nisur hetime për atentat me motive terroriste, ndërsa detajet mbi autorët dhe mënyrën e organizimit të sulmit nuk janë bërë publike. Ngjarja pritet të ndikojë më tej në përshkallëzimin e retorikës mes Rusisë dhe Perëndimit, në një klimë tashmë të tensionuar marrëdhëniesh.