Një zhvillim i rëndësishëm pritet sot në Lindjen e Mesme, pasi burime diplomatike lënë të kuptohet se një marrëveshje për armëpushim në Rripin e Gazës mund të shpallet brenda ditës. Një zyrtar i lartë rajonal, i përfshirë në negociata, tha për gazetën “The National” se bisedimet kanë hyrë në një fazë të avancuar dhe se një njoftim pozitiv është i mundshëm, edhe pse ende po punohet për detajet.
Kryeministri i Katarit, Mohammed bin Abdulrahman Al Thani, ndodhet sot në Kajro, ku po zhvillon takime me ndërmjetësit egjiptianë. Të dy vendet kanë paraqitur një propozim që parashikon një armëpushim 60-ditor, lirimin e 10 pengjeve izraelite, kthimin e trupave të të paktën 15 izraelitëve të vrarë, si dhe shkëmbimin me qindra të burgosur palestinezë. Propozimi mbështetet nga një garanci e shkruar e Shteteve të Bashkuara, e cila parashikon nisjen e negociatave indirekte mes Hamasit dhe Izraelit për tërheqjen graduale të trupave izraelite dhe një marrëveshje më afatgjatë për paqen.
Aktualisht, besohet se Hamasi mban rreth 50 pengje, nga të cilët 20 mendohet se janë ende gjallë. Pikërisht ky element, së bashku me presionin ndërkombëtar për të shmangur një ofensivë tokësore izraelite në qytetin e Gazës, ka shtuar urgjencën e negociatave.
Megjithatë, pengesat mbeten. Ministri i Jashtëm egjiptian, Abdr Abdelatty, deklaroi se ekzistojnë “kushte të papranueshme” që po vonojnë arritjen e një marrëveshjeje gjithëpërfshirëse. Ai theksoi se plani aktual është një version i modifikuar i dokumentit të propozuar nga i dërguari amerikan Steve Uitkoff dhe se Egjipti ka ofruar ide shtesë që mund të kenë sukses nëse ka vullnet politik nga Izraeli.
Në të njëjtën kohë, Kajro ka mbajtur një qëndrim të prerë kundër çdo përpjekjeje për zhvendosjen e popullsisë palestineze nga Gaza. Ministria e Jashtme egjiptiane paralajmëroi se çdo shtet që mbështet një plan të tillë do të konsiderohet bashkëfajtor në “spastrimin etnik” dhe do të përballet me pasoja ligjore dhe historike.
Radar.al