BERAT– “Blutë” e Beratit kanë vënë në pranga një 39-vjeçar pasi dyshohet se ka plagosur me thikë një shtetas gjatë një konflikti për motive të dobëta.
Bëhet me dije se kjo ngjarje ka ndodhur në lagjen “Barrikadë”, ku, menjëherë pas marrjes së njoftimit për një person të plagosur me mjet prerës, shërbimet e Komisariatit të Policisë organizuan ndërhyrjen dhe mbërritën në vendngjarje.
Si rezultat i veprimeve të shpejta hetimore dhe operacionale, u bë i mundur identifikimi dhe kapja e autorit të dyshuar, shtetasit me iniciale A. T., 39 vjeç, banues në Berat. Sipas hetimeve paraprake, ai dyshohet se mbrëmjen e djeshme, gjatë një konflikti për motive të dobëta, ka goditur me thikë shtetasin D. N., 48 vjeç. I plagosuri ndodhet jashtë rrezikut për jetën./Radar.al