Një ngjarje e rënde është regjistruar në qytetin e Kukësit. Dy persona kanë mbetur të plagosur me armë zjarri në rrethana që ende nuk janë sqaruar plotësisht.
Sipas informacioneve paraprake, të plagosur kanë mbetur shtetasit A. C., 36 vjeç, dhe S. K., 65 vjeç. Ata janë transportuar për ndihmë mjekësore, ndërsa gjendja e tyre shëndetësore nuk bëhet ende e ditur zyrtarisht.
Nga veprimet e para hetimore dyshohet se autorë të ngjarjes janë shtetasit F. I., 39 vjeç, dhe N. I., 38 vjeç, vëllezër, të cilët janë shpallur në kërkim nga policia.
Shërbimet e Policisë po vijojnë kontrollet intensive në zonë për lokalizimin dhe kapjen e autorëve të dyshuar. Ndërkohë, grupi hetimor ndodhet në vendngjarje dhe, nën drejtimin e Prokurorisë, po punon për zbardhjen e plotë të rrethanave të ngjarjes dhe dokumentimin ligjor të saj.