TIRANË– Kryeministri Edi Rama ditën e sotme ka theksuar nevojën për të shmangur neglizhencën në procesin e përmbushjes së standardeve për integrimin evropian.
Rama gjatë fjalës së tij në një aktivitet të zhvilluar me operatorët e biznesit ushqimor, Rama u shpreh se i druhet qasjes së vonesave dhe mentalitetit “ka kohë”, duke nënvizuar se procesi drejt Bashkimi Evropian kërkon përgatitje të detajuar dhe zbatim hap pas hapi.
“Unë i trembem neglizhencës alla-shqiptarçe ‘se ka kohë’. I tremben asaj idesë që hajde se do ja gjejmë edhe rrugën BE sesi t’ja rrëshqasim topin në për shalë. Prandaj duhet filluar që sot, me një plan gradual dhe me dije të plotë se çfarë duhet bërë hap pas hapi.”-deklaroi kryeministri.
Shefi i qeverisë deklaroi se kontrollet shtetërore nuk do të kenë karakter ndëshkues, por do të shërbejnë si mbështetje për bizneset.
Sipas tij, është hartuar një strategji që synon të informojë dhe orientojë sipërmarrjet për përmirësimin e standardeve, përmes një procesi të vazhdueshëm monitorimi dhe këshillimi.
“Kontrollet janë të vlefshme për t’ju ndihmuar ju. Prandaj kemi bërë edhe një strategji, që nuk do jenë kontrolle ndëshkimi, por një mision kombëtar për një nga hallkat e ekonomisë sonë që të gjithë njerëzit që janë në këtë hallkë të dobët të marrin një informacion të plotë se ku ndodhen. Kontrollet do të lënë porosi për tu zbatuar dhe pastaj do të rikthehen për të parë zbatimin. Kontrollet duhet të jenë mbrojtëse të interesit publike, por edhe mbështetëse të çdo sipërmarrje që nuk është duke shkelur ligjin, por ka nevojë të rrisë standardet. Kapacitetet tona laboratorike duhet të përforcohen për tu gjendur pranë dhe për të qenë të mirëorganizuara në terren.”– tha Rama.
Rama pranoi gjithashtu se pikat e kontrollit kufitar mbeten një hallkë e dobët: Pikat e kontrollit kufitar janë një pikë e dobët, të cilën do ta adresojmë për të lehtësuar dhe për të zhdërvjelltësuar shtetin në kryerjen e detyrës pa u bërë pengesë dhe mur në kufijtë e vendit./Radar.al