Një aksident detar është regjistruar mesditën e sotme pranë gjirit të Kakomesë, në zonën e njohur si “Bukajeto”, ku dy skafe plastikë u përplasën gjatë lëvizjes rreth orës 13:10.
Nga goditja mbetën të plagosur tre turistë të huaj:
Charlotte Ann Richards, 23 vjeç, shtetase australiane
Alit El Haj Sofian, 27 vjeç, shtetas francez
Bionne Catherine, 25 vjeç, shtetase franceze
Pas sinjalizimit, u zhvillua një operacion i koordinuar shpëtimi nga Qendra Kombëtare e Kërkim-Shpëtimit, Qendra Ndërinstitucionale Operacionale Detare dhe Policia Kufitare e Sarandës. Për shkak të terrenit, ambulancat nuk mund të hynin deri në Kakome, ndaj të lënduarit u transportuan fillimisht me mjet lundrues të Policisë Kufitare dhe më pas me ambulancë drejt spitalit të Sarandës.
Mjekët konfirmuan se të plagosurit janë jashtë rrezikut për jetën.
Hetimet vijojnë për të zbardhur shkaqet e përplasjes, ku dyshohet se valëzimi ka ndikuar në incident.