Kryeministri Edi Rama ka reaguar pas kritikave të shkaktuara nga deklaratat e tij për “Bulevardin e Flamingove”, duke sqaruar se mesazhi i tij nuk ishte drejtuar ndaj protestuesve, por ndaj “mësimeve” që, sipas tij, mori nga flamingot.
Përmes një postimi në rrjetin social X, Rama theksoi se nuk ka asnjë kontratë politike me ata që kërkojnë dorëheqjen e tij, duke shtuar se mandati i tij buron nga vota e rreth 800 mijë shqiptarëve.
“Përsërisin që s’duan dialog, s’ka negociata, s’japin besë, por duan vetëm dorëheqjen time. Keqkuptim i madh. Asnjë prej tyre s’më ka dhënë votë, me asnjë prej tyre s’kam kontratë dhe për asnjë prej tyre s’më ka shkuar ndërmend të prish kontratën me 800 mijë shqiptarë”, shkruan Rama.
Kryeministri shton se fjala e tij ishte një reflektim mbi simbolikën e flamingove dhe jo një mesazh për ata që ai i cilëson si “sorra dhe korba”.
“Fjala ime ishte për mësimet që mora nga flamingot dhe i drejtohej atyre, jo puplave të zeza që mblidhen çdo natë në bulevard pas shtegtimit të flamingove. Sorrat dhe korbat janë ana e errët e protestës, por nuk kanë asnjë lidhje me ato mësime”, shprehet ai.
Në fund të reagimit, Rama thekson se protestuesit janë të lirë të kërkojnë dorëheqjen e tij deri në vitin 2029, por nënvizon se kjo nuk ndikon në mandatin që, sipas tij, i është besuar nga qytetarët.
“Le të vijnë poshtë dritares sime me kërkesën për dorëheqje deri në vitin 2029, po të duan. Liria është e njëjtë edhe për ta dhe demokracia funksionon njësoj për të gjithë. Kontrata ime me shqiptarët nuk varet prej tyre, por është pronë e atyre që ma kanë besuar me votë”, përfundon Rama.