Ditën e sotme mësohet se është vënë në pranga biznesmeni Oltion Buzi, pronari i subjektit tregtar “Buzi Store”.
Policia bën me dije se ndalimi i tij u bë pas vendimit të gjykatës e cila caktoi në mungesë “arrest në burg” për veprën penale “fshehje të ardhurash”.
Kujtojmë se në janar të këtij viti Buzi u shpall në kërkim me urdhër të prokurorisë së Tiranës e cila zbuloi evazionin fiskal.
Sipas hetimeve të prokurorisë “Buzi Store” nuk kishte deklaruar 3.7 milionë euro të ardhura te autoritetet tatimore.
Prokuroria mnjofton se Oltion Buzi përdorte një sistem të paligjshëm për lëshimin e faturave false tatimore, sistem kompjuterik i paautorizuar nga Tatimet në vend që operonte përmes një platformës online të palicencuar “store.dyqanimen.com”.
Hetimet nisën pas referimit të bërë nga Drejtoria e Hetimit Tatimor, ku u zbulua se ky subjekt tregtar lëshonte fatura me vlera më të mëdha, ndërkohë që deklaronte një vlerë shumë më të vogël për qëllime tatimore, duke shmangur kështu pagesën e detyrimeve tatimore.