Futbolli në Arabinë Saudite siguron miliona, por duket se nuk të kënaq. Dhe kjo duket qartë nga fakti se shumë yje që zgjodhën milionat tani po arratisen nga vendi saudit, ndërsa ata që kanë qëndruar atje, po bëjnë veprime të pazakonta për atë që cilësohet si futboll profesionist.
Karim Benzema e nisi i pari duke refuzuar të luajë për Al itihad që i ka ofruar një rinovim kontrate me shifra më të ulëta. Sulmuesi francez raportohet se është ndjerë “i fyer” nga ky trajtim që i është bërë nga sheikët. Ndërkohë, shtohen zërat se gjithçka është një strategji e qartë për të finalizuar largimin e tij nga Al Itihad drejt Al Hilal të Inzagit.
Pikërisht kjo lëvizje ka sjellë edhe vendimin e bujshëm të Kristiano Ronaldos për të bojkotuar ndeshjen e sotme të Al Nasr në kampionat ndaj Al Rijad. Sipas “A’Bola”, portugezi është inatosur me fondin “PIF” që menaxhon klubin e tij i cili nuk po bën asnjë lëvizje për të përforcuar skuadrën. Fakti që i njëjti fond menaxhon Al Hilal dhe po projekton kalimin e Benzema atje, ka tensionuar edhe më shumë situatën me Ronaldon i cili ka marrë këtë masë drastike./PanoramaSport