Aktori i njohur amerikan Sean Penn, 65 vjeç, është rikthyer në qendër të vëmendjes mediatike pas publikimit të disa pamjeve ku shfaqet krah partneres së tij, Valeria Nicov, e cila është 34 vite më e re se ai.
Çifti u fotografua teksa po bënte pazar në Santa Monica, por ajo që tërhoqi menjëherë vëmendjen në rrjetet sociale nuk ishte vetëm diferenca e madhe e moshës. Kontrasti i dukshëm në gjatësi mes tyre mjaftoi që pamjet të shpërndaheshin me shpejtësi, duke ndezur komente ironike dhe kritike online.
“Duhet të jetë shumë i shkurtër”, “Ajo duket si vajza e tij”, “Çifti më i çuditshëm që kam parë”, por edhe “Më pëlqen një burrë që nuk është i kompleksuar”, janë disa nga reagimet që qarkulluan gjerësisht në platforma të ndryshme.
I njohur për diskrecionin ndaj jetës private, Sean Penn nuk ka folur publikisht për lidhjen me Valeria Nicov dhe nuk e ka përmendur atë në intervista. Megjithatë, thashethemet për romancën e tyre nisën në shtator të vitit 2024, kur u panë së bashku në Madrid.
Konfirmimi i parë publik erdhi në nëntor, kur të dy u shfaqën në tapetin e kuq të edicionit të 21-të të Festivalit Ndërkombëtar të Filmit në Marrakesh, ku Penn u nderua për kontributin dhe arritjet e tij të jashtëzakonshme në kinematografi.
Sean Penn ka pasur një jetë sentimentale të bujshme. Ai është martuar tri herë: me Madonnën (1985–1988), me Robin Wright (1996–2010) dhe me aktoren australiane Leila George, me të cilën u martua në vitin 2020 dhe u divorcua në vitin 2022.
Ndër vite, aktori është lidhur gjithashtu nga mediat amerikane me emra të njohur si Charlize Theron, Scarlett Johansson dhe Olga Korotyaeva.
