Kryeministri Edi Rama reagoi ndaj pretendimeve të përhapura në rrjetet sociale për shkatërrimin e Banjave Termale të Bënjës, duke i cilësuar ato si pjesë e një fushate dezinformimi të nxitur, sipas tij, nga algoritmet dhe “të njëjtat duar të huaja” që kanë përhapur më parë edhe alarmin për flamingot.
Përmes një postimi në rrjetet sociale, Rama u shpreh se gjatë 24 orëve të fundit është shpërndarë me shpejtësi një informacion i pavërtetë për gjendjen e banjave termale, duke pretenduar se ai është amplifikuar artificialisht në platformat online.
“Prej 24 orësh është lëshuar një tjetër raketë digjitale, që algoritmi e ka shpërthyer në qindra mijëra reagime, me të njëjtën metodë dhe me ndihmën e të njëjtave duar të huaja që përhapën edhe alarmin për flamingot”, shkroi kryeministri.
Për të mbështetur qëndrimin e tij, Rama publikoi një video nga Bënja, ku sipas tij shihet gjendja aktuale e banjave termale, me vaskat e mbushura me ujë dhe vizitorë që po i frekuentojnë ato.
“Kush do të vërtetën e ka në këtë video, sot, nga Bënja”, shkroi ai.
Kryeministri kujtoi gjithashtu se zona e ujërave termale të Bënjës ndodhet aktualisht në proces rikualifikimi, në kuadër të një investimi të realizuar nga Fondi Shqiptar i Zhvillimit. Projekti parashikon ndërtimin e rrugëve të reja të aksesit, hapësirave të shërbimit, zonave rekreative dhe ambienteve për zhvillimin e aktiviteteve kulturore dhe promovimin e traditave e produkteve karakteristike të zonës së Përmetit.