Policia e Tiranës ka finalizuar operacionin policor të koduar “Shape”, duke zbuluar në Yzberisht një banesë të përshtatur për përpunimin e lëndëve narkotike.
Gjatë kontrollit në banesën e 61-vjeçarit Sh. K., shërbimet e policisë sekuestruan:
17 kilogramë kanabis në formë çokollate, të ndara në 69 paketime,
22.5 litra vaj kanabisi,
rreth 65 gramë kokainë,
1 armë zjarri pistoletë dhe
1 armë gjahu.
Sasitë e drogës, sipas vlerësimeve, arrinin në një shumë rreth 500 mijë euro.
Nga hetimet paraprake dyshohet se 61-vjeçari siguronte sasi të mëdha kanabisi dhe kokaine, i përgatiste në trajta të ndryshme dhe i shiste në Yzberisht.
Operacioni u zhvillua pas disa muajsh hetime me metoda proaktive, nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë.
Policia njofton se hetimet vijojnë për të dokumentuar plotësisht veprimtarinë kriminale dhe për identifikimin e bashkëpunëtorëve të mundshëm.
Radar.al