Dossieri i hartuar nga gjykatësi Erion Bani kundër Erjon Veliajt, bazon akuzën për korrupsionin e kryetarit të bashkisë mbi kontributin ekonomik që 6 sipërmarrës i kanë dhënë OJF-ve të Ajola Xoxes në formë sponsorizimesh për aktivitete artistike ose konsulenca ligjore, në këmbim të lejeve të ndërtimit të lëshuara nga bashkia. Kontributet ekonomike, të paguara gjithmonë me fatura, nuk lidhen drejtpërdrejt me Erjon Veliajn, por me OJF-të e bashkëshortes së tij ose me studion e saj ligjore, dhe madje edhe në aspektin kohor nuk përputhen gjithmonë me momentin e dhënies së lejeve të ndërtimit. Gjithsesi, gjykatësi i GJKKO ka besuar në teorinë e prokurorit Ols Dado, i cili ka udhëhequr hetimet, dhe për këtë arsye ka urdhëruar arrestimin e Erjon Veliajt dhe sipërmarrësit Elman Abule, si dhe “detyrim paraqitjeje” për 5 sipërmarrës të tjerë, të dyshuar si korruptoret.
Leja e ndërtimit nuk është një tender publik, ku garojnë disa kompani dhe vetëm një mund të fitojë. Në raste të tilla, ndodh që një sipërmarrës të korruptojë autoritetin kontraktues për të fituar projektin. Në këto raste, nëse provohet, korrupsioni është i qartë.
Por leja e ndërtimit është një e drejtë që i takon ekskluzivisht pronarit të tokës dhe që kryetari i bashkisë ka detyrimin ta japë, me kushtin e vetëm që ndërtimi të respektojë rregulloret urbanistike. Nëse ky kusht përmbushet dhe kryetari refuzon dhënien e lejes së ndërtimit, atëherë ai kryen veprën penale të “shpërdorimit të detyrës”. Pra, krimi ndodh kur një leje ndërtimi refuzohet padrejtësisht dhe jo kur jepet në mënyrë legjitime. Në asnjë moment hetimi i SPAK nuk pretendon se lejet e ndërtimit të dhëna nga Erjon Veliaj, në këmbim të sponsorizimeve për Ajola Xoxen, janë dhënë në shkelje të ligjit urbanistik. Atëherë, pse sipërmarrësit do të paguanin bashkeshorten e Erjon Veliajt duke e ditur se leja e ndërtimit ishte e drejta e tyre?
Teoria akuzuese e prokurorit Ols Dado është se Erjon Veliaj kërkonte pagesa ose favore edhe kur leja e ndërtimit ishte e ligjshme dhe e detyrueshme për t’u dhënë. Dhe pikërisht këtu hyn në lojë konflikti i interesit. Në datë 9 shtatori 2021 Ols Dado, së bashku me një grup pronarësh të tjerë, ka marrë nga Erjon Veliaj leje ndërtimi U-14098/4 për ndërtimin e një pallati 9-katësh (me 2 katesh nëntoke) në rrugën e Bogdaneve. Pyetja që duhet bërë është: A ka paguar edhe Ols Dado Erjon Veliajn për të marrë këtë leje ndërtimi? A ka qenë edhe Ols Dado i detyruar të sponsorizojë aktivitetet e Ajola Xoxes, përndryshe Erjon Veliaj do t’ia kishte refuzuar lejen e ndërtimit, ndonëse me ligj ai kishte të drejtë ta merrte?
Përgjigja është thelbësore. Sepse nëse, siç besojmë, Ols Dado nuk ka paguar kryetarin e bashkisë për të marrë atë leje ndërtimi, atëherë teoria e tij akuzuese rrëzohet. Në këtë rast, pikërisht Ols Dado, i cili ka kërkuar arrestimin e Erjon Veliajt, bëhet dëshmitari që vërteton se Erjon Veliaj nuk kërkonte para për të dhënë leje ndërtimi, duke dëshmuar kështu pafajësinë e tij.
Kjo është prova e qartë e konfliktit të interesit. Ols Dado ndodhet në një pozicion të dyfishtë: ai është përfaqësues i akuzës, por edhe një dëshmitar i mundshëm i mbrojtjes. Për këtë arsye, Kryeprokurori Altin Dumani nuk duhet ta kishte lejuar kurrë Ols Dadon të udhëhiqte këtë hetim, sepse konflikti i interesit i krijuar nga ajo leje ndërtimi mund të rrezikojë të gjithë procesin. Nëse e ka ditur për ekzistencën e saj, Altin Dumani ka gabuar duke e konfirmuar Dadon në këtë çështje. Nëse Altin Dumani nuk e ka ditur për lejen e ndërtimit të marrë nga Erjon Veliaj, atëherë Ols Dado ka tradhtuar besimin e tij dhe tani ai vete duhet të tërhiqet./ Shqiptarja.com
