Presidenti amerikan Donald Trump ka komentuar aktakuzën e ish-drejtorit të FBI-së, James Comey, duke paralajmëruar se edhe figura të tjera nga kampi i kundërshtarëve politikë mund të përballen me drejtësinë.
“Nuk është se kam një listë, por mendoj se do të ketë të tjerë,” tha Trump për gazetarin e CNN, Kevin Liptak, të premten, teksa largohej nga Shtëpia e Bardhë për të marrë pjesë në Ryder Cup në New York.
Trump e përshkroi Comey-n dhe të tjerë si “radikalë të majtë të korruptuar” që, sipas tij, e kanë politizuar sistemin e drejtësisë si askush më parë në historinë e SHBA. “Ajo që kanë bërë është e tmerrshme. Shpresoj që të ketë edhe të tjerë, sepse nuk mund ta lejojmë që kjo të ndodhë në një vend si ky,” shtoi ai.
Aktakuzat ndaj Comey-t u lëshuan nga Departamenti i Drejtësisë, vetëm pak ditë pasi Trump kishte kërkuar publikisht ndjekjen penale të tij. Lëvizja u shoqërua me largimin e një prokurori që kishte kundërshtuar aktakuzën – një hap që analistët e konsideruan si një përpjekje e paprecedent për të ndëshkuar kundërshtarët politikë të Presidentit.
Comey përballet me dy akuza për deklarata të rreme para Kongresit. Sipas aktakuzës, ai kishte mohuar në vitin 2020 përpara Senatit se kishte autorizuar rrjedhje informacioni në media gjatë kohës që drejtonte FBI-në.
Trump u shpreh se provat ndaj Comey-t janë të qarta: “Është një rast i thjeshtë. Ai gënjeu. E dinte rëndësinë e pyetjes që iu bë në Senat dhe mendoi se do t’ia hidhte pa u kapur. Por u kap.”
Presidenti theksoi se procesi nuk është hakmarrje, por “drejtësi e domosdoshme”: “Nuk është për hakmarrje. Është për drejtësi. Nuk mund të lejojmë që këta njerëz radikalë të vazhdojnë të bëjnë çfarë të duan,” përfundoi ai.