Një ndërprerje teknike preku Facebook gjatë së dielës, duke shkaktuar probleme për mijëra përdorues në mbarë botën, të cilët raportuan vështirësi në hyrjen në llogaritë e tyre dhe në përdorimin e funksioneve kryesore të platformës.
Sipas raportimeve, shumë përdorues nuk mundën të hynin në Facebook përmes aplikacionit apo faqes zyrtare, ndërsa të tjerë hasën probleme me përditësimin e News Feed, ngarkimin e fotove dhe videove, si edhe me dërgimin e mesazheve në Messenger.
Pas ndërprerjes, shumë përdorues iu drejtuan platformës X (ish-Twitter), ku ndanë përvojat e tyre dhe raportuan problemet. Brenda pak minutash, hashtag-u #Facebook u bë ndër më të komentuarit.
“Nuk mund të hyj në Facebook, thjesht më del se llogaria është e padisponueshme”, shkroi një përdorues, ndërsa një tjetër u ankua se ishte “hera e tretë brenda një muaji që ndodh një problem i tillë”.
Deri më tani, Meta, kompania që zotëron Facebook, nuk ka dhënë një reagim zyrtar për shkakun e ndërprerjes apo për kohën kur shërbimi do të rikthehet plotësisht në normalitet.