Një kompani japoneze po synon të bëjë realitet atë që deri më sot dukej si skenar science-fiction: udhëtimin nga Tokio në qytete amerikane si Nju Jorku apo Uashingtoni për vetëm 60 minuta – duke përdorur hapësirën.
Agjencia “Nippon Travel” ka njoftuar planet për të nisur një shërbim transporti super të shpejtë, në bashkëpunim me startup-in japonez të raketave të ripërdorshme, “Innovative Space Carrier Inc.”.
Sipas projektit, udhëtimi do të kryhet me një mjet që niset nga një platformë në det të hapur, duke kaluar nëpër hapësirë për të lidhur çdo dy pika të Tokës brenda një ore.
Një biletë vajtje-ardhje do të kushtojë rreth 100 milionë jen, ose 657 mijë dollarë, dhe do të ofrohet fillimisht për klientët që kërkojnë një përvojë ekskluzive.
“Shpresojmë që ky projekt të jetë një pikënisje e re për të lidhur turizmin me udhëtimin hapësinor”, deklaroi presidenti i “Nippon Travel”, Keigo Yoshida, gjatë prezantimit në Tokio.
Kompania pritet të nisë pranimin e aplikimeve të avancuara për shërbimin në vitin fiskal 2026.
Projekti do të zhvillohet me disa faza: fillimisht me ture dhe përvoja tokësore të lidhura me hapësirën dhe degustime ushqimesh hapësinore, që do të nisin nga viti 2026, për të kaluar më vonë në qëndrime orbitale, të planifikuara për vitet 2040.
Sipas Kojiro Hatada, drejtues i “Innovative Space Carrier Inc.”, objektivi afatgjatë është ulja e kostove të udhëtimit hapësinor duke rritur numrin e fluturimeve të mundshme për çdo mjet raketor.
Nëse projekti realizohet, Japonia mund të hapë një epokë të re në udhëtimin global – ku distancat ndërkontinentale përshkohen në kohën që sot kërkon një udhëtim mesdy qytetesh brenda vendit.