SHKODËR– Reshjet e borës në qarkun e Shkodrës kanë vijuar në zonat malore, si në Vermosh të Malësisë së Madhe dhe Qafë Thore që lidh Shkodrën me Thethin.
Raportohet se tashmë trashësia e borës ka arritur deri në 80 cm. Lajm ky i bërë me dije nga përgjegjësi i Autoritetit Rrugor Shqiptar për Rajonin e Veriut, Hajrullah Sylja teksa shton se aktualisht të gjitha akset janë të kalueshme.
ARSH i bën thirrje gjithë drejtuesve të automjeteve që të respektojnë rregullat e qarkullimit rrugor në mënyrë që të mos mbesin të bllokuar në akset malore ku ka reshje bore. Sylja thotë se ajo që mbetet më shumë shqetësim në këtë përkeqësim të motit në territorin e qarkut Shkodër mbetet rënia e gurëve në akse të ndryshme malore dhe rrëshqitja e dherave duke kërkuar që drejtuesit e mjeteve edhe për këtë pjesë të tregohen të kujdesshëm.
Pritet që në ditët në vijim, reshjet e borës dhe shiut të vijojnë në qarkun Shkodër gjë e cila mund ta vështirësojë situatën ndaj drejtuesit e mjeteve duhet të marrin masat ndërsa këshillohet që të shmangen lëvizjet e panevojshme./Radar.al