Sëmundja e rrezikshme e Murtajës së Ruminantëve të Vegjël është përhapur edhe në juglindje të vendit. Pas disa rasteve të konfirmuara në Shkodër, Dibër, Bulqizë dhe Skrapar, sot është regjistruar vatra e parë në qarkun e Korçës, konkretisht në fshatin Shuec të Bashkisë Devoll.
Sipas autoriteteve veterinare, një fermeri në këtë zonë i kanë ngordhur 13 nga 170 krerët e bagëtive të imta. Sëmundja u konfirmua menjëherë nga specialistët e Shërbimit Veterinar të Korçës, të cilët po marrin masa për asgjësimin e kafshëve të infektuara.
Në një rreze 3 kilometërshe, që përfshin fshatrat Shuec, Rakickë dhe Zagradec, është vendosur karantinë veterinare, duke ndaluar çdo lëvizje të dhenve dhe dhive jashtë zonës.
Ministria e Bujqësisë ka ndaluar përkohësisht lëvizjen e bagëtive në të gjithë vendin që prej datës 9 qershor, duke përfshirë tregtimin dhe kullotat e përbashkëta. Lejohet vetëm transporti për në thertore, me certifikatë veterinare.
Murtaja e Ruminantëve të Vegjël është një sëmundje virale shumë ngjitëse për delet dhe dhitë, me rrezik të lartë ngordhshmërie. Edhe pse nuk transmetohet te njerëzit, ajo përbën një kërcënim të madh për ekonominë blegtorale në vend.