Një vatër e murtajës së ruminantëve ka shkaktuar dëme të rënda në fshatin Val të Bulqizës, duke zhytur në dëshpërim familjen Meta, të vetmit banorë të mbetur në këtë zonë të thellë malore. Ferma e Hekuran Metës, me qindra krerë dhi, është goditur nga kjo sëmundje ngjitëse, duke detyruar autoritetet veterinare të asgjësojnë rreth 200 krerë brenda 24 orëve, ndërsa pjesa e mbetur pritet të asgjësohet së shpejti.
“Më kanë marrë bukën e gojës. Kjo ishte mënyra ime e vetme e jetesës. Sot kanë ngordhur edhe të tjerat. Këtu nuk do të na gjente as rusi, jo më virusi,” u shpreh me lot në sy Hekuran Meta për Top Channel.
Fermeri Bajram Meta, i prekur po ashtu nga ky fatkeqësim, kërkon jo kompensim financiar, por rikthimin e tufës: “Mos më jepni para, dua dhi. Me to mbaj familjen gjallë.”
Sipas llogaritjeve të tyre, dëmi ekonomik i shkaktuar vetëm për këtë sezon arrin deri në 100 mijë euro, për shkak të humbjes së qumështit dhe kërcave.
Shkaku i përhapjes së sëmundjes, sipas fermerëve, lidhet me kontrabandën e kafshëve në tregjet e gjësë së gjallë, ku shpesh shiten pa matrikuj dhe pa certifikata shëndetësore. “Dikush solli qingja nga Korça dhe ato më infektuan dhitë,” deklaron Hekurani.
Murtaja e ruminantëve është një sëmundje e rrezikshme, relativisht e re në Shqipëri, por e njohur nga mjekësia veterinare. Ekspertët paralajmërojnë se nëse nuk nis menjëherë një fushatë vaksinimi nga Ministria e Bujqësisë, fermat e tjera në vend mund të përballen me të njëjtin fat tragjik.
Në fshatin Val, atje ku dikur dëgjoheshin zilet e dhive, tani mbretëron heshtja. “Më mbeten vetëm zilet bosh, t’ua var njerëzve të shtëpisë,” përfundon me dhimbje Bajram Meta.