Prej të paktën 48 orëve të fundit, duket se po krijohet një klimë negociatash mes SHBA-ve dhe Iranit. Pentagoni ka pezulluar bombardimet në Hormuz, pjesërisht sepse nuk i konsideron më efektive dhe pjesërisht sepse po i pakësohen rezervat e raketave Patriot dhe armëve të tjera. Teherani është përgjigjur se është i gatshëm të rifillojë negociatat, nëse Uashingtoni do të respektojë memorandumin e mirëkuptimit të nënshkruar në qershor.
Të martën, kryeministri izraelit Netanyahu do të jetë në Shtëpinë e Bardhë për t’u takuar me Trumpin dhe dinamika mund të ndryshojë sërish, por të paktën në këto orë diplomacia mund të ketë një tjetër dritare mundësie për të zgjidhur krizën, në mos për t’i dhënë fund përfundimisht luftës.
Pas gati dy javësh sulmesh ajrore, prej tri ditësh amerikanët nuk kanë kryer më bombardime. Sipas The New York Times, arsyeja është se të premten, gjatë një mbledhjeje në Dhomën e Situatave për të shqyrtuar opsionet e një përshkallëzimi të mundshëm, shefi i Shtabit të Përbashkët, gjenerali Caine, e paralajmëroi presidentin se mund të vazhdojë me ofensivën, por rrezikon të mbetet pa raketa Patriot të mjaftueshme, interceptorë dhe armë të tjera, të domosdoshme si për vazhdimin e operacioneve ashtu edhe për mbrojtjen e SHBA-ve.
Zëvendëspresidenti Vance, i cili ka qenë gjithmonë më skeptiku ndaj ndërhyrjes në Iran, mbështeti qëndrimin e gjeneralit, duke bindur Trumpin të ndalej. Sipas mediave, fjala vendimtare në fakt erdhi nga komandanti i Komandës Qendrore, Brad Cooper, sipas të cilit sulmet në Ngushticën e Hormuzit nuk i shërbejnë më asnjë qëllimi strategjik dhe, për këtë arsye, nuk ia vlen të vazhdojnë, edhe sikur të kishte armë të mjaftueshme. Të dielën, ambasadori amerikan në OKB, Mike Waltz, konfirmoi se presidenti kishte urdhëruar ndalimin e sulmeve për t’u dhënë “pak hapësirë” bisedimeve me Iranin.
Trump zgjodhi këtë pauzë për t’u dhënë mundësi të dërguarve të Omanit të shkonin në Teheran për të diskutuar rihapjen e Hormuzit, ndërsa zëdhënësi i Ministrisë së Jashtme iraniane, Esmail Baghaei, konfirmoi se bisedimet me vendet fqinje të ngushticës kanë sjellë përparim. Al Arabiya raportoi se Republika Islamike i ka bërë të ditur Pakistanit se është e gatshme të rifillojë negociatat me SHBA-të në Gjenevë, Doha ose Islamabad.
Nëse Cooper ka të drejtë, atëherë kreu i Shtëpisë së Bardhë ndodhet përballë një situate pa shumë alternativa, sepse nëse bombardimet në Hormuz nuk kanë më dobi, i vetmi opsion ushtarak që mbetet është përshkallëzimi me sulme ndaj objektit bërthamor të Pickaxe, ose operacione tokësore për të sekuestruar uraniumin e pasuruar dhe për të rrëzuar regjimin. Të gjitha këto janë skenarë shumë të rrezikshëm, sidomos duke pasur parasysh se zgjedhjet afatmesme do të mbahen pas rreth 100 ditësh.
Netanyahu deklaroi për Fox News se nesër do të dëgjojë Trumpin, pasi vendimi përfundimtar i takon atij. Mund të përpiqet ta bindë se negociatat janë humbje kohe, por interesat e tij mund të mos përputhen me ato të presidentit./La Repubblica