Një operacion i Forcave Kufitare britanike ka zbuluar një përpjekje për të futur ilegalisht në Mbretërinë e Bashkuar 20 shtetas shqiptarë, të cilët ndodheshin të fshehur në një jaht luksoz në Kanalin Anglez.
Jahti dyshohet se ishte nisur nga Bresti, Francë, me destinacion Newquay në jug të Anglisë. Gjatë kontrollit të ushtruar të dielën, autoritetet zbuluan 19 burra dhe një grua të fshehur nën kuvertë.
Të gjithë personat janë ndaluar dhe janë në proces për t’u dëbuar nga Mbretëria e Bashkuar, sipas një zëdhënësi të Ministrisë së Brendshme britanike.
Ndër të arrestuarit është Bleda Bega, 44 vjeç, i cili akuzohet për “lehtësim të hyrjes së paligjshme” në territorin britanik dhe ndodhet aktualisht në paraburgim. Ai pritet të dalë përpara gjykatës në Bodmin.
Dy shqiptarë të tjerë janë arrestuar për të njëjtën akuzë; njëri prej tyre është liruar nga hetimi penal, por vijon të mbahet i ndaluar për shkak të qëndrimit të paligjshëm në Britani.