Ish-ministri i Drejtësisë, Ylli Manjani ka bërë një analizë të thelluar mbi gjendjen aktuale të sistemit gjyqësor në Shqipëri, duke treguar çfarë do të bënte ndryshe nëse do të kishte përsëri drejtimin e këtij dikasteri.
Manjani kritikoi procesin gjyqësor aktual, të cilin e cilësoi të përkeqësuar dhe jo garantues për një gjykim të drejtë. “Procesi gjyqësor është i përkeqësuar, si në afatet e gjykimit, ashtu edhe në kuptimin e garancive. Nuk kemi një sistem akuzator, por inkuizicion. Nëse flet prokurori, je i dënuar,” theksoi ai në emisionin “Oponencë” në News24.
Ish-ministri nënvizoi nevojën urgjente për thjeshtimin e procedurave dhe të gjuhës ligjore, në mënyrë që qytetari të kuptojë saktësisht se çfarë ndodh me të gjatë një procesi gjyqësor. “Duhet të krijohet një procedurë e thjeshtë, protokollare, me një gjuhë të qartë. Kur qytetari shkon në gjykatë, ose kur vjen policia në shtëpi, ai të dijë si të mbrohet — nuk janë të gjithë avokatë,” u shpreh Manjani.
Ai shtoi se një nga problemet kryesore është mungesa e aksesit real në drejtësi për qytetarët pa formim juridik. Sipas tij, roli i avokatit duhet të jetë i theksuar vetëm në nivele të larta të gjykimit, ndërsa në instancat e para, qytetari duhet të jetë në gjendje të kuptojë dhe të mbrojë të drejtat e tij.
“Avokati duhet të ndërhyjë për një gjykatë të lartë, ku procesi bëhet më i komplikuar, por qytetari duhet të kuptojë situatën në gjykatë,” përfundoi Manjani.