Kryeministri i Malit të Zi, Millojko Spajiç, njoftoi se Podgorica do të ashpërsojë së shpejti regjimin e vizave për shtetasit rusë, në përputhje me politikën e vizave të Bashkimit Evropian. Mali i Zi e ndjek plotësisht politikën e jashtme dhe të sigurisë së BE-së, duke përfshirë masat ndaj Rusisë, që vendosi sanksione ndaj Moskës në vitin 2022 pas pushtimit të Ukrainës.
Aktualisht, qytetarët rusë mund të qëndrojnë deri në 30 ditë pa vizë në Mal të Zi, dhe shpesh përdorin një praktikë “dalje-hyrje” për të zgjatur qëndrimin. Sipas të dhënave të Ministrisë së Punëve të Brendshme, në vend jetojnë mbi 21,100 shtetas rusë.
Komisioni Evropian ka paralajmëruar disa herë Podgoricën se harmonizimi i politikës së vizave është i domosdoshëm për përparimin në bisedimet për anëtarësim dhe për qasjen në mjetet e Planit të Rritjes për Ballkanin Perëndimor. Mali i Zi ka zotuar se do të vendosë gradualisht viza për të gjitha vendet që BE-ja i ka futur në listën e sanksioneve, përfshirë Azerbajxhanin, Bahrejnin, Bjellorusinë, Kinën, Katarin, Rusinë, Arabinë Saudite, Emiratet e Bashkuara Arabe dhe Turqinë. Së fundmi, vizat janë vendosur për shtetasit turq.
Qeveria malazeze ka argumentuar më herët se mosndjekja e plotë e politikës së vizave të BE-së është për të mbrojtur interesat ekonomike në turizëm, i cili përbën 26% të Prodhimit të Brendshëm Bruto të vendit. Çdo vit, Mali i Zi vizitohet nga rreth 230,000 shtetas rusë dhe 320,000 turq, ndërsa Kina dhe vendet e Lindjes së Afërt marrin pjesë në projekte infrastrukturore dhe investime në vend.
Brukseli ka theksuar se interesat ekonomike nuk mund të kenë përparësi ndaj rregullave evropiane dhe detyrimeve të procesit të anëtarësimit. Autoritetet malazeze presin që harmonizimi i plotë i regjimit të vizave me BE-në të përfundojë deri në fund të vitit 2027, me synimin që Mali i Zi të bëhet anëtare e Bashkimit Evropian në vitin 2028.