Një ngjarje e rëndë ka ndodhur ditën e djeshme në qendër të Bushatit, ku një mosmarrëveshje për motive të dobëta përfundoi me plagosjen e një personi dhe arrestimin e autorit.
Sipas burimeve zyrtare nga Policia e Vau i Dejës, shtetasi B. Sh., 56 vjeç, banues në fshatin Mali i Jushit, ka goditur me mjet prerës (kosore) shtetasin P. V., 39 vjeç, gjatë një konflikti që ndodhi brenda një lokali.
Falë veprimeve të shpejta të policisë, autoritetet arritën të kapnin dhe arrestonin në flagrancë autorin, si dhe të sekuestronin mjetin prerës të përdorur në ngjarje.
Hetimet paraprake tregojnë se viktima ka pësuar lëndime në kokë dhe në pjesë të tjera të trupit, përfshirë një frakturë në krahun e djathtë. Ai ndodhet nën kujdesin e mjekëve dhe fatmirësisht jashtë rrezikut për jetën.
Ndaj shtetasit B. Sh. janë ngritur procedurat ligjore përkatëse, ndërsa materialet janë referuar Prokurorisë për veprime të mëtejshme.