Kryeministri britanik në largim, Keir Starmer, mbajti fjalimin e tij të fundit në Parlament, duke njoftuar se po i jep fund karrierës së tij politike dhe duke e cilësuar këtë moment si mbylljen e një kapitulli të rëndësishëm të jetës së tij publike.
Gjatë seancës së fundit të Pyetjeve të Kryeministrit (PMQs), Starmer u shpreh krenar për punën e bërë në drejtimin e qeverisë dhe falënderoi bashkëpunëtorët e tij për përkushtimin dhe mbështetjen e vazhdueshme. Ai vlerësoi stafin e tij, duke theksuar se ata kanë qenë gjithmonë të gatshëm të përballen me çdo sfidë.
Sipas mediave britanike, atmosfera në sallën e Parlamentit ishte ndryshe nga zakonisht. Deputetë nga të gjitha krahët politikë lanë mënjanë përplasjet partiake për t’i shprehur respekt dhe mirënjohje kryeministrit në largim. Në përfundim të fjalimit, Starmer u përcoll me duartrokitje në këmbë nga deputetët laburistë dhe një pjesë e opozitës, ndërsa familja e tij e ndoqi momentin nga galeria e Parlamentit. Disa prej kolegëve të tij nuk i fshehën emocionet, duke vlerësuar lidershipin dhe kontributin e tij gjatë viteve në politikë.
Starmer pritet t’ia dorëzojë detyrën Andy Burnham të hënën, pasi ish-kryetari i Bashkisë së Greater Manchester u konfirmua si lideri i ri i Partisë Laburiste në konferencën e posaçme të zhvilluar të premten.
Gjatë debatit, liderja e konservatorëve, Kemi Badenoch, shmangu kritikat e ashpra ndaj Starmer, duke vlerësuar qëndrimin e tij në mbështetje të Ukrainës dhe marrëdhënien e tij me presidentin Volodymyr Zelensky. Megjithatë, ajo kritikoi deputetët laburistë dhe pasardhësin e tij, Andy Burnham, i cili mungoi në seancë.
Nga ana tjetër, lideri i Liberal Demokratëve, Ed Davey, e cilësoi Starmer një “patriot të vërtetë”, duke theksuar se ai kishte bashkëpunuar me deputetë të të gjitha forcave politike.
Në fjalimin e tij, Starmer iu drejtua edhe të ftuarve të pranishëm në galerinë e Parlamentit, mes të cilëve ndodheshin persona që kishte njohur gjatë kohës në Downing Street.
“Për të gjithë ata në galeri, jeta e të cilëve është ndryshuar ose përmirësuar nga kjo qeveri laburiste, dhe për të gjithë ata në mbarë vendin që kanë luftuar për t’u dëgjuar ose parë, ju jeni arsyeja pse hyra në politikë”, u shpreh ai.
Megjithëse dha dorëheqjen pas presionit të brendshëm në Partinë Laburiste, vetëm dy vjet pas fitores së thellë në zgjedhje, Starmer u përcoll me duartrokitje të gjata nga kolegët e tij. Siç ndodh zakonisht në paraqitjen e fundit të një kryeministri në PMQs, seanca pati një atmosferë më të qetë, e shoqëruar edhe me momente humori për shpresat e Anglisë në Kupën e Botës dhe zhvillimet politike në Clacton.
Seanca nisi me një ton solemn, teksa Starmer bëri homazhe për ish-deputeten Anne Widdecombe, duke kujtuar se ishte tronditëse që gjatë kohës së tij në Parlament tre deputetë, aktualë ose ish-deputetë, kishin humbur jetën si pasojë e sulmeve. Edhe Badenoch e vlerësoi Widdecombe, duke e përshkruar si një politikane me personalitet të fortë dhe humor të veçantë.
Në fund, Badenoch paralajmëroi se ndryshimi i kryeministrit nuk do të zgjidhë problemet e Partisë Laburiste, duke shtuar se sfidat për qeverinë e re sapo kanë filluar.