Kryeministri Edi Rama ka vijuar sot replikat me Drejtuesin Politik të Koalicionit Euroatlantik, Lulzim Basha.
Në një video të publikuar në rrjetet sociale, të titulluar “Zgjimi i Lulit (episodi 9)”, Rama ironizon duke theksuar se Basha nuk është më “ai Luli tsunami i dikurshëm”.
“Çfarë të bëhet o Lul. I shqetësuar jam, shumë i shqetësuar jam, për ty kuptohet se për vete e di që po e ndave mendjen më vë përfund edhe këtë herë, po si do bëhet se u ngrite lart kur u zgjove më vure përpara, po ke rënë prapë. Të tremb, të tremb ai dreq bufi më duket se s’je ai Luli tsunami i dikurshëm, nuk je, nuk e ke atë, nuk e di çfarë ka ndodhur me ty”, thotë Rama në video.
Ndërsa Basha citon Berishën, Rama vijon ironinë.
“Ja e shef rri dëgjon bufin. Akoma i thua doktori, po çfarë doktori mor Lul të shkuli si me qenë dhëmb qumështi, pa anestezi, me qysqi, doktori, doktori, cili doktor mo”, thotë Rama.
“Plus që i ka lëshu pllumat ai e ke vu re, i fiket llampa përditë në mes të bisedës flet kuturu. Unë mezi po pres kur ti thotë Flamurit Luli. Ti prapë se prapë ke frikë, nuk e di çudi e madhe pse e ke frikë bufin, pse?”, vijon kryeministri
Duke vijuar replikën në distancë, Rama thotë se Basha mezi po pret “gjumin e verës”.
“Unë sa hap sytë flas me vete, ku është Luli a do ta shof vallë Lulin, çfarë do bëj Luli sot. Pastaj trembem se del përpara ashtu vigan, timonier, fitimtar. Mirëpo sa hap ti gojës them “mos ky mezi pret me ja fut gjumit të verës më duket, s’ka sy për qabe”. Të përshëndes”, shprehet Rama.