ISHP në Maqedoni ka bërë thirrje për të shmangur aktivitetet e punës në natyrë gjatë orëve të nxehta të ditës, nga ora 11:00 deri në 17:00, për shkak të rritjes së temperaturave që pritet të zgjasë deri më 27 qershor.
Sipas njoftimit, grupet më të rrezikuara janë punëtorët që kryejnë aktivitet jashtë, si ndërtuesit, fermerët, policët e trafikut dhe punonjësit e shpërndarjes, të cilët janë më të ekspozuar ndaj ndikimit të valëve të nxehtësisë dhe rrezatimit termik.
Instituti rekomandon punëdhënësve të sigurojnë kushte të përshtatshme pune, përfshirë ventilimin dhe ajrin e kondicionuar në ambiente të mbyllura, si dhe të krijojnë dhoma freskuese ku punonjësit të mund të marrin pushime.
Gjithashtu, këshillohet bërja e pushimeve të shpeshta, furnizimi me lëngje dhe elektrolite, rotacioni i detyrave për të shmangur ekspozimin e vazhdueshëm ndaj nxehtësisë dhe zhvendosja e punonjësve në zona më të freskëta sa herë që është e mundur.
Masat janë të nevojshme për të mbrojtur shëndetin e punonjësve gjatë periudhës së valës së nxehtësisë.