Kreu i Partisë së Lirisë, Ilir Meta, i shoqëruar edhe nga anëtari i Kryesisë të Partisë së Lirisë, Avokat Genc Gjokutaj, ka vizituar t% martën në burgun e Fierit Ervin Salianjin, i cili po vuan dënimin me një vit burg për kallëzim të rremë.
Lajmin e ka bërë me dije vetë Meta në një postim në rrjetet sociale, ku thotë se ky takim “më bindi edhe më shumë se burgu politik vetëm e ndez frymën e Ndryshimit dhe përmbysjen e juntës në fuqi”.
Postimi i Ilir Metës
Sot, me kërkesën time, së bashku me anëtarin e Kryesisë të Partisë së Lirisë, Avokat Genc Gjokutaj, takova në burgun e Fierit deputetin tribun të Partisë Demokratike dhe opozitës, z.Ervin Salianji, i cili po vuan burgun politik të Narkoshtetit.
Takimi ishte shprehje e solidaritetit kundër Narkoregjimit në fuqi dhe Narkodrejtësisë. Ky takim më bindi edhe më shumë se burgu politik vetëm e ndez frymën e Ndryshimit dhe përmbysjen e juntës në fuqi.
Krenar për heronjtë e fjalës së lirë, të cilët as në burg nuk e humbasin Lirinë.