Ish-ministri i Shëndetësisë, Ilir Beqaj, ka reaguar përmes avokatit të tij, duke denoncuar atë që e cilëson si një shkelje të vazhdueshme të së drejtës për një proces të rregullt ligjor. Në reagimin publik, Beqaj shpreh shqetësimin se të pandehurit në paraburgim nuk kanë mundësi reale për të lexuar dosjet e tyre gjyqësore, ndonëse proceset penale vijojnë prej vitesh në Gjykatën e Posaçme.
Sipas tij, prej më shumë se gjashtë vitesh janë duke u zhvilluar dhjetëra procese penale me dosje voluminoze, të cilat Prokuroria e Posaçme ua vë në dispozicion avokatëve vetëm në format elektronik (PDF), ndërsa gjykatës edhe në formë të printuar. Ndërkohë, i pandehuri i paraburgosur mbetet i përjashtuar nga mundësia për t’u njohur me dosjen e vet, pasi institucionet e vuajtjes së dënimit nuk i lejojnë përdorimin e një kompjuteri pa internet, edhe nën kushte të kontrolluara.
Beqaj ngre pyetjen se si mund të garantohet një mbrojtje efektive dhe një vendimmarrje e informuar nga i akuzuari, nëse ai nuk ka akses në provat, aktet procedurale, përgjimet dhe deklarimet që përbëjnë dosjen gjyqësore. Ai e cilëson absurde zgjidhjen e printimit të mijëra faqeve, duke argumentuar se një praktikë e tillë është e pamundur në kushtet e paraburgimit.
Në deklaratë theksohet se ligji nr. 81/2020 “Për të drejtat dhe trajtimin e të dënuarve me burgim dhe të paraburgosurve”, si dhe Rregullorja e Përgjithshme e Burgjeve, nuk parashikojnë ndalim për përdorimin e një kompjuteri pa internet nga i paraburgosuri. Sipas Beqajt, çdo pretendim i kundërt përbën ose keqinterpretim të kuadrit ligjor, ose shmangie përgjegjësie nga institucionet përkatëse.
Ai sjell gjithashtu shembuj të qëndrimeve kontradiktore të prokurorëve dhe gjykatësve në seanca të ndryshme, duke theksuar se askush nuk merr përgjegjësi për garantimin e kësaj të drejte themelore. Sipas tij, kërkesat për akses në dosjen elektronike shpesh trajtohen padrejtësisht si tentativa për të zvarritur procesin.
Në përfundim, Beqaj shpreh dyshimin se kjo situatë synon lodhjen dhe demoralizimin e të akuzuarve, si dhe uljen e cilësisë së mbrojtjes ligjore, duke e kthyer atë në një formalitet. Ai u bën thirrje institucioneve përgjegjëse dhe Dhomës Kombëtare të Avokatisë që të reagojnë.
“Është koha për t’i dhënë fund proceseve që nuk garantojnë aksesin real të të akuzuarit në dosjen e tij,” përfundon reagimi i Ilir Beqajt.