Inspektorati Kombëtar i Mbrojtjes së Territorit (IKMT) ka vijuar sot aksionin për prishjen e ndërtimeve pa leje në zonën e mbrojtur të Thethit, duke shembur një objekt dy katësh që ishte ende në fazë ndërtimi. Sipas njoftimit zyrtar, ndërtesa ishte ngritur pa leje ndërtimi dhe në shkelje të rregullave mjedisore.
Aksioni është shoqëruar me reagim të ashpër nga banorët e zonës, të cilët kanë organizuar një protestë kundër ndërhyrjes së IKMT-së, duke bllokuar urën e vetme që të çon në fshatin turistik. Ata e cilësojnë këtë veprim si të padrejtë dhe të dëmshëm për të ardhmen ekonomike të zonës, që mbështetet tërësisht në turizëm.
“Na vrasin të ardhmen! Po na largojnë turistët!”, janë shprehur disa nga protestuesit, ndërsa tensionet me policinë kanë qenë të pranishme gjatë gjithë paradites. Banorët i kanë kërkuar qeverisë shtyrjen e aksionit deri në përfundim të sezonit turistik dhe fillimin e një dialogu për të gjetur një zgjidhje të përbashkët.
Megjithatë, këto thirrje nuk janë marrë parasysh. IKMT vijon shembjet në përputhje me urdhrin e kryeministrit Edi Rama për të ndaluar çdo ndërhyrje të paligjshme në territorin e mbrojtur. Në shenjë revolte, banorët kanë paralajmëruar mbylljen e bujtinave dhe bllokimin e plotë të qarkullimit drejt Thethit nëse nuk ndalet aksioni.