Banorët e fshatit turistik të Thethit kanë bllokuar urën hyrëse të zonës, duke penguar kalimin e Policisë së Shtetit, që shoqëron Inspektoratin Kombëtar të Mbrojtjes së Territorit (IKMT) në një aksion për prishjen e ndërtimeve pa leje.
Për momentin, forcat e rendit nuk po arrijnë të hyjnë në fshat, ndërsa situata paraqitet e tensionuar. Protestuesit shprehen të shqetësuar për vendimin e IKMT-së, duke thënë se ndërtesat që rrezikojnë të prishen janë shtëpi druri, të ndërtuara në tokën e tyre.
“Është një shtëpi e thjeshtë prej druri, pa beton, pa strukturë betoni – vetëm në tokën time,” thotë mes lotësh një banor me aftësi të kufizuara. “Kemi bërë kërkesë për leje, por na refuzojnë. I bëjmë thirrje shtetit të mos na nxjerrë në rrugë.”
Aksioni i IKMT në këtë zonë vijon prej disa ditësh dhe ka shkaktuar reagime të forta nga komuniteti lokal, i cili kërkon dialog dhe zgjidhje, jo përplasje.