Situata paraqitet e tensionuar në Theth, ku Inspektorati Kombëtar i Mbrojtjes së Territorit, në bashkëpunim me policinë, ka nisur një aksion për prishjen e ndërtimeve pa leje në zonën e mbrojtur. Aksioni ka hasur në rezistencën e banorëve, të cilët kundërshtojnë ndërhyrjen, duke e konsideruar atë të padrejtë dhe shkatërruese për jetesën e tyre.
Një prej banorëve, Bekim Koçeku, është përplasur me forcat e ndërhyrjes duke dalë përpara makinerive të rënda. Me lot në sy, ai u bëri thirrje institucioneve të ndalojnë aksionin:
“Po na prishin shtëpitë, po na nxjerrin në rrugë. Nuk kam me çfarë të shlyej kreditë. Le të më shtypin, por këtë vend nuk e lë,” tha Koçeku.
Në krah të tij, edhe motra e tij reagoi ashpër ndaj aksionit, duke theksuar se familja ka investuar gjithçka për të ndërtuar jetën në Theth.
“Kemi ngritur 5 shtëpi me mund dhe sakrifica. Bekimi ka marrë kredi, ka hequr dorë nga gjithçka. Ne nuk dalim nga këtu, edhe po të na shtypin fadromat,” u shpreh ajo.
Nga ana tjetër, drejtori për zbatimin e vendimeve në IKMT, Fatmir Mete, konfirmoi se në këtë zonë janë identifikuar rreth 70 deri në 80 ndërtime pa leje që pritet të shemben.
“Thethi është një zonë e mbrojtur dhe ndërtimet pa leje nuk mund të tolerohen,” deklaroi ai.
Banorët ndërkohë paralajmërojnë se do të vijojnë rezistencën, ndërsa tensionet në terren mbeten të larta.