Gjykata Kushtetuese ka rrëzuar përfundimisht kërkesën e biznesmenit Pëllumb Gjoka për kthimin e rreth 390 mijë metrave katrorë tokë në Velipojë, të cilat janë bllokuar në kuadër të hetimeve për veprimtari kriminale. Vendimi mban në fuqi sekuestron e pronave të vendosur më parë nga gjykatat më të ulëta, duke hedhur poshtë pretendimet e Gjokës dhe të afërmve të tij se konfiskimi është antikushtetues.
Në kërkesën e tij, Gjoka argumentonte se pronat ishin të regjistruara ligjërisht në emër të një shoqërie dhe të të afërmit të tij në Agjencinë Shtetërore të Kadastrës. Por Kushtetuesja nuk e pranoi këtë si bazë për shfuqizim, duke e konsideruar të drejtë vendimmarrjen e mëparshme të drejtësisë.
Pëllumb Gjoka, i arrestuar në korrik 2023, dyshohet si pjesë e një organizate kriminale ndërkombëtare të përfshirë në vrasje, pengmarrje, korrupsion dhe pastrim parash. Ai është pronar i “Imperial Group”, kompani e përfshirë në investime në turizëm dhe lojëra fati. Në vitin 2021, kompania mori statusin e “investitorit strategjik” për projektin luksoz “Silver Sand Resort” në bregdetin e Velipojës, me një vlerë të planifikuar investimi prej 52 milionë euro.
Çështja ndaj Gjokës mori vëmendje të shtuar pas mbërritjes së një dosjeje voluminoze nga autoritetet franceze, e cila çoi në një hetim të thelluar për aktivitetin e dyshuar kriminal të grupit që ai dyshohet se drejtonte.