Gjykata e Posaçme njoftoi shtyrjen për më 12 Shkurt të seancës ndaj ish-ministrit të Mbrojtjes Fatmir Mediu.
Mos zhvillimi i seancës sot, erdhi për shkak të mungesës së ish-ministrit, që përmes një deklarate njoftonte gjykatën se ndodhej në SHBA për të kryer disa ekzaminime mjekësore.
Njëkohësisht, përmes avokatit, Mediu kërkonte të ishte i pranishëm në sallë gjatë përballjes me ekspertët që kanë kryer akt ekspertimin tekniko-ushtarak.
Kujtojmë se ish-ministri i Mbrojtjes po gjykohet për dosjen “Gërdeci”, i dyshuar për “shpërdorim detyre”.
Në seancën e fundit të zhvilluar në GJKKO u legjitimuan dy ekspertët, ndërsa avokatët e Mediut duhet të dorëzonin pyetjet e tyre lidhur me këtë akt-ekspertimi që ka në thelb kalibrat e armëve që demontoheshin në Gërdec.
Për Mediun, shqyrtimi i kësaj prove është absurd sa kohë flitet për përgjegjësi ushtarake dhe jo civile dhe nuk kanë lidhje me detyrën e një ministri.
Ndërsa SPAK thotë se ai ka shpërdoruar detyrën me nxjerrjen e disa akteve nënligjore që kanë sjellë avantazhe për shoqëritë private që do kryenin demontimin.
Akt-ekspertimi në atë kohë tregon se shtetit iu shkaktua një dëm prej 59 mln Lekësh, pasi nuk ishte përllogaritur transporti i municioneve. Nga shpërthimi në Gërdec më 15 Mars 2008 humbën jetën të paktën 26 persona e u plagosën qindra të tjerë./Radar.al