Autoritetet kanë identifikuar autorin e dyshuar të plagosjes së ndodhur pasditen e sotme në Hamallaj, Durrës. Bëhet fjalë për Altin Lekegegaj, 44 vjeç, i cili u largua nga vendi i ngjarjes me një automjet “Toyota Yaris” pas incidentit.
Sipas njoftimit zyrtar të Policisë, konflikti ka ndodhur për motive të dobëta, konkretisht për një vend parkimi. Gjatë grindjes, Lekegegaj ka plagosur me armë zjarri 28-vjeçarin L. R., i cili ndodhet në spital në gjendje kritike për jetën.
Shërbimet e Policisë reaguan menjëherë, duke identifikuar autorin dhe duke nisur ndjekjen e tij. Postblloqe janë vendosur në disa zona të Durrësit, si dhe në autostradën Durrës – Tiranë, ndërsa kontrollet vijojnë në ambientet ku dyshohet se mund të jetë fshehur autori.
Grupi hetimor po punon për zbardhjen dhe dokumentimin e plotë të rrethanave të ngjarjes, ndërsa Policia fton qytetarët që të raportojnë çdo informacion të dobishëm për kapjen e autorit.