Një plagosje me armë zjarri ka tronditur pasditen e sotme zonën e Hamallajt, në Durrës. Sipas të dhënave paraprake, një person ka mbetur i plagosur pasi është qëlluar me dy plumba në trup nga një autor ende i paidentifikuar zyrtarisht.
Autori i dyshuar, i cili sipas burimeve policore mendohet të jetë shtetasi me inicialet A.L., është larguar menjëherë nga vendngjarja me një automjet tip “Toyota Yaris”, duke humbur gjurmët.
Policia ka reaguar me shpejtësi, duke ngritur postblloqe në rrugët që lidhin Hamallajn me autostradën Durrës–Tiranë, si dhe përgjatë aksit kombëtar ku dyshohet se është zhvendosur autori. Forcat blu ndodhen aktualisht në terren dhe po kryejnë kontrolle intensive për kapjen e tij.
Ndërkohë, i plagosuri është dërguar me urgjencë në spital dhe ndodhet nën kujdesin e mjekëve. Gjendja shëndetësore e tij ende nuk është bërë e ditur zyrtarisht.