Në kushtet e përshkallëzimit të situatës së sigurisë në Lindjen e Mesme, kryeministri i Shqipërisë, Edi Rama, zhvilloi një komunikim të posaçëm online me ambasadorët shqiptarë në rajon, duke kërkuar angazhim maksimal për garantimin e sigurisë së shtetasve shqiptarë.
Sipas të dhënave zyrtare, vetëm në Emiratet e Bashkuara Arabe, përfshirë Dubain dhe zona të tjera, ndodhen rreth 1500 shqiptarë që jetojnë dhe punojnë atje.
Gjatë bisedës, Rama u kërkoi përfaqësuesve diplomatikë të mbajnë kontakte të vazhdueshme me komunitetin shqiptar dhe të sigurojnë regjistrimin e plotë të shtetasve pranë ambasadave, për të qenë të gatshëm për çdo nevojë që mund të lindë nga zhvillimet e fundit.
Ambasadori i Shqipërisë në Bashkimin Europian, Ferit Hoxha, i propozuar nga Rama për postin e ministrit të Jashtëm, theksoi rëndësinë e komunikimit të rregullt me qytetarët.
“E mira është që të mbajmë kontakte, të jenë të tërë të regjistruar, të keni mundësi të keni kontakt me ambasadën sepse në çdo orë ne do të jemi ata që mund t’i ndihmojmë ata,” u shpreh Hoxha.
Rama nënvizoi se koordinimi mes institucioneve dhe përfaqësive diplomatike do të garantojë informim në kohë reale për çdo zhvillim.
“Për çdo gjë, me këtë ekip që keni të koordinuar, besoj se do të jeni të informuar në kohë reale,” tha kryeministri.
Ndërkohë, ambasadori i Shqipërisë në Emiratet e Bashkuara Arabe, Ridi Kurtezi, deklaroi një ditë më parë se aktualisht nuk ka nevojë për panik dhe se nuk ekzistojnë kushtet për të kërkuar evakuim urgjent të shqiptarëve që jetojnë atje.