Humbja tragjike e futbollistit Fatjon Bunjaku ka tronditur komunitetin sportiv dhe ka sjellë reagime të shumta nga klubet ku ai ka luajtur.
Pas lajmit të rëndë, AF Elbasani ka shprehur dhimbjen për ndarjen nga jeta të sulmuesit 22-vjeçar, duke e cilësuar atë si një lojtar me kontribut dhe përkushtim ndaj skuadrës.
Në një reagim zyrtar në rrjetet sociale, klubi thekson se Bunjaku nuk ishte vetëm një futbollist, por edhe një pjesëtar i rëndësishëm i familjes së ekipit, i cili la gjurmë me paraqitjet dhe angazhimin e tij në fushë.
“Me dhimbje të thellë morëm lajmin për ndarjen nga jeta të lojtarit tonë, Fatjon Bunjaku. Sot, familja e madhe e klubit tonë humbi jo vetëm një lojtar, por një njeri që mbajti me krenari ngjyrat e klubit dhe kontribuoi në historinë tonë”, thuhet në reagimin e AF Elbasanit.
Klubi verdheblu ka shprehur gjithashtu ngushëllime për familjen dhe të afërmit e tij, duke theksuar se kujtimi i tij do të mbetet pjesë e historisë së skuadrës.
“Në këto momente të vështira, mendimet dhe lutjet tona janë me familjen Bunjaku, miqtë dhe të gjithë ata që e njohën dhe e deshën Fatjonin. Ai nuk do të harrohet”, mbyllet deklarata e klubit.