Presidenti i Shteteve të Bashkuara, Donald Trump, ka deklaruar se Uashingtoni dhe Irani janë shumë pranë arritjes së një marrëveshjeje, ndërsa sipas tij kanë mbetur vetëm disa çështje të vogla për t’u finalizuar.
Në një intervistë për NBC News, Trump u shpreh optimist për ecurinë e negociatave, duke theksuar se pengesat e mbetura nuk janë të natyrës së rëndësishme. “Jemi shumë afër një marrëveshjeje. Ka disa pika që duhen finalizuar, por nuk janë çështje të mëdha”, deklaroi ai.
Presidenti amerikan përsëriti se Teherani ka pranuar, sipas tij, të mos zhvillojë apo sigurojë armë bërthamore, që mbetet një nga pikat kryesore të diskutimeve mes palëve.
Trump tha gjithashtu se ka kërkuar që në marrëveshje të përfshihet një klauzolë shtesë, e cila do të ndalonte Iranin jo vetëm nga prodhimi i armëve bërthamore, por edhe nga blerja apo sigurimi i tyre nga burime të tjera.
Sipas tij, fillimisht pala iraniane ka shfaqur rezerva ndaj këtij formulimi, por më pas ka pranuar përfshirjen e tij në marrëveshje.