Ish-deputeti i Partisë Demokratike, Ervin Salianji, nuk e përjashton mundësinë që një ditë të garojë për kryetar të forcës më të madhe opozitare, por shton se ky nuk është momenti i duhur.
“Do isha jo i vërtetë po të thosha që nuk kam ambicie,” tha Salianji në emisionin Breaking në Top News. Ai theksoi se përqendrohet aktualisht në betejën opozitare dhe diskutimet me qytetarët që e shohin opozitën si instrument për ndryshim shoqëror, jo thjesht për ambicie personale.
Salianji shtoi se strategjia kryesore e opozitës duhet të përqendrohet te protesta masive në rrugë, si mënyrë për të paralizuar mekanizmat e qeverisë dhe për të ndikuar në zgjidhje konkrete, sidomos pas publikimit të raportit të OSBE-ODIHR.
“Duhet të ketë protesta masive, në rrugë. Duhen për të paralizuar veprimtarinë e qeverisë dhe për të shkuar në zgjidhje konkrete,” u shpreh ai.