Në Kopshtin Zoologjik të Berlinit u festua sot ditëlindja e parë e binjakeve panda, Leni dhe Lottie. Dhurata e veçantë për këtë rast ishin topa të ngrira me lëng panxhari dhe karrote, të cilat këlyshët i shijuan me kureshtje përpara se të ngjiteshin në bambu e të luanin së bashku.
Të lindura një vit më parë me vetëm 200 gramë secila, pandat tashmë peshojnë nga 21 kilogramë dhe janë rritur në mënyrë të shpejtë, duke kaluar nga foshnje të brishta në arinj të vegjël plot energji. Megjithëse kanë filluar të hanë bambu, ato ende preferojnë qumështin e nënës së tyre, Meng Meng.
Binjaket janë pjesë e një programi të njohur si “diplomacia e pandave”, pasi kafshët mbeten pronë e Kinës, e cila i jep hua kopshtij zoologjikë në vende të ndryshme të botës. Aktualisht, në natyrë numërohen më pak se 2,000 panda të rritura.