Një tragjedi e rëndë dhe e pazakontë ka tronditur thellë botën e Hollywood-it, duke kthyer në skenë krimi një familje të njohur dhe duke lënë pas dhimbje, shok dhe shumë pikëpyetje. Djali i regjisorit të njohur Rob Reiner dhe bashkëshortes së tij Michele Singer është vënë në qendër të akuzave për vrasjen brutale të prindërve të tij, në rrethana që autoritetet i përshkruajnë si jashtëzakonisht të dhunshme.
Sipas të dhënave të deritanishme, 32-vjeçari Nick Reiner dyshohet se ka sulmuar prindërit e tij ndërsa ata ndodheshin të shtrirë në shtrat, duke i therur në fyt. Krimi u zbulua pasditen e së dielës, rreth orës 15:30, kur vajza e çiftit, Romy Reiner, 27 vjeçe, shkoi në banesë dhe gjeti trupat e pajetë të prindërve të saj.
E tronditur nga ajo që pa, ajo njoftoi menjëherë policinë, duke deklaruar se vëllai i saj ishte “i rrezikshëm” dhe se dyshonte fort për përfshirjen e tij në ngjarje. Në momentin kur trupat u gjetën, Nick nuk ndodhej në shtëpi, ndonëse kishte jetuar aty së fundmi.
Pas disa orësh kërkimesh, ai u arrestua rreth orës 21:15 në një motel pranë Santa Monica Pier, rreth 15 milje larg banesës familjare. Hetuesit raportuan se dhoma ku ai ishte strehuar ishte e mbuluar me gjak, përfshirë edhe dushin, ndërsa dritaret ishin mbyllur me çarçafë, duke shtuar edhe më shumë dyshimet për përpjekje për fshehje të gjurmëve.
Nick Reiner, i cili rrallë ka dalë në publik, ka folur më parë për betejën e gjatë me varësinë nga droga. Në një intervistë të vitit 2016, ai kishte rrëfyer se kishte hyrë për herë të parë në rehabilitim në moshën 15-vjeçare dhe se më pas kishte kaluar edhe 17 trajtime të tjera. Ai kishte pranuar se varësia e kishte çuar në pastrehim dhe në situata që rrezikonin jetën e tij.
Në intervista të tjera, ai kishte treguar episode të errëta të së shkuarës, ku gjatë bingerëve të drogës kishte shkatërruar shtëpinë e mysafirëve të prindërve, duke thyer dhe dëmtuar gjithçka që i dilte përpara, nga televizorët te pjesë të tjera të banesës.
Sipas burimeve pranë hetimit, dyshohet se dhuna mund të ketë pasuar një grindje të ndodhur gjatë një feste familjare të Hanukkah, ku ishin të pranishëm edhe disa të ftuar. Disa prej tyre kanë dëgjuar konfliktin dhe, kur më vonë mësuan për vrasjen, u shprehën se “askush nuk u habit” nga përfshirja e Nickut në këtë tragjedi.
Ndërkohë, policia dhe autoritetet ligjore vijojnë hetimet për të zbardhur plotësisht motivet dhe rrethanat e krimit, ndërsa Los Angeles mbetet i tronditur nga kjo ngjarje e rëndë, që ka shkatërruar një familje dhe ka lënë pas një histori dhune, varësie dhe fundi tragjik.