Detaje të reja kanë dalë në dritë lidhur me vrasjen e 23-vjeçarit Renis Dobra, trupi i të cilit u gjet më 9 korrik pranë liqenit të Shkopetit, në fshatin Madhesh të Matit.
Sipas hetimeve në zhvillim, dy makina Range Rover të ardhura nga Rrësheni i kanë bërë pritë të riut për ta rrëmbyer. Një makinë tjetër, që dyshohet se ka ardhur nga Miloti, ka kontrolluar rrugën përgjatë 12 kilometrave në aksin Milot-Burrel për të monitoruar lëvizjet dhe për të siguruar rrugën.
Babai i Renisit, pasi nuk arriti të kontaktonte me të birin për disa orë, njoftoi policinë për zhdukjen e tij. Fillimisht nisën kërkimet, por trupi i 23-vjeçarit u gjet vetëm ditën e djeshme pranë liqenit.
Automjeti me të cilin Dobra kishte dalë nga shtëpia dyshohet të ketë rënë në ujë, por ende nuk është gjetur.
Nga ekspertiza paraprake rezulton se në trupin e të riut janë konstatuar shenja mbytjeje me litar në zonën e qafës, që konfirmojnë dyshimin për vrasje. Mjekësia ligjore do të japë konkluzionet përfundimtare mbi shkakun e vdekjes.
Policia ka deklaruar se ka zbardhur pjesërisht dinamikën e ngjarjes dhe vazhdon hetimet intensive për identifikimin dhe kapjen e të përfshirëve.