TIRANË– Ministri i Brendshëm, Besfort Lamallari ditën e sotme ka marrë pjesë në ceremoninë e betimit të drejtorit të ri të Policisë së Shtetit, Skënder Hita, duke e cilësuar këtë një moment të rëndësishëm për institucionin e sigurisë.
Lamallari deklaroi se është kënaqësi të jetë pjesë e një momenti kaq të rëndësishëm për Policinë e Shtetit, sidomos në një kohë kur nevoja për forcimin e këtij institucioni është e madhe.
Ai theksoi se përzgjedhja e drejtuesit të ri ka kaluar në disa faza, me qëllim garantimin që drejtimi i këtij institucioni kyç t’i besohej një figure të besueshme. “Fituesi duhej të ishte një dhe vetëm një, por vlerësoj të gjitha kandidaturat që morën pjesë në këtë proces.”-u shpreh ministri.
Duke u ndalur te drejtori i ri, Lamallari deklaroi se Hita gëzon mbështetjen e plotë të ministrisë dhe qeverisë, duke shtuar se ai është një figurë me përvojë dhe profesionalizëm që garanton stabilitet dhe vazhdimësi në drejtimin e Policisë së Shtetit. Ministri nënvizoi gjithashtu rëndësinë e përmbushjes së misionit si shërbëtorë publikë dhe lidhi këtë me procesin e integrimit të vendit në Bashkimi Evropian. Sipas tij, negociatat janë të hapura dhe progresi i Shqipërisë po vlerësohet nga partnerët ndërkombëtarë.
“Kjo nuk është thjesht retorikë”, theksoi Lamallari, duke shtuar se institucionet duhet të vijojnë punën për të përmbushur standardet e kërkuara në rrugën drejt integrimit evropian. Është kënaqësi që të marr pjesë në këtë moment të rëndësishëm për Policisë së Shtetit për drejtorin e ri, në një kohë kur nevoja për këtë strukturë është e madhe. Përtej solemnitetit të këtij rasti, dua të nënvizoj disa fakte. Për të mbërritur në këtë proces, u kaluan disa faza. U sigurua që drejtim i këtij institucioni kyç t’i besohet një figure me besim. Fituesi duhet të ishte një dhe vetëm një, por vlerësoj të gjitha kandidaturat. Lidhur me kandidatin fitues, që ka marrë bekimin e ministrit dhe qeverisë, jam i bindur, që të gjithë që jeni këtu sot, ndani bindjen se zoti Skënder Hita është një figurë e rëndësishme, duke garantuar stabilitet. Është personalitet karriere. Duhet të përmbushim misionin tonë, si shërbëtorë publikë ndaj vendit. Integrimi i vendit në BE bëhet si mision me rëndësi, në kontekstin ku ndodhet sot Shqipëria. Negociatat janë të hapura dhe progresi i Shqipërisë po vlerësohet nga partnerët tanë ndërkombëtarë. Kjo nuk është retorikë. Shqipëria ka zgjedhur rrugën e stabilitetin.”- tha Lamallari./Radar.al