Zv/kryeministrja dhe ministrja e Infrastrukturës dhe Energjisë, Belinda Balluku, deklaroi se argjinatura e Ferrasit nuk ka pësuar dëmtime dhe nuk është çarë, duke hedhur poshtë zërat për një defekt në strukturë.
Sipas Ballukut, përmbytja e disa banesave ka ardhur si pasojë e rritjes së nivelit të ujit dhe jo nga ndonjë çarje e argjinaturës. Ajo bëri të ditur se në pikën e matjes në Memaliaj, niveli aktual i ujit ka zbritur në 5.3 metra, nga 8 metra që ishte në orët e mëngjesit, duke treguar një rënie të qëndrueshme.
Balluku theksoi se ekipet e Emergjencave kanë ndërhyrë në kohë, duke evakuuar banorët në zonat e rrezikuara, ndërsa puna në terren vijon për normalizimin e situatës.
Nga ana e tij, ministri i Mbrojtjes, Pirro Vengu, konfirmoi se argjinatura është e qëndrueshme dhe se me uljen e prurjeve në grykderdhjen e Vjosës pritet përmirësim i mëtejshëm i situatës.
Vengu bëri të ditur se hidrovoret deri në Darëzezë po funksionojnë me kapacitet të plotë, duke krijuar rezerva në kanalet kulluese. Sa i përket evakuimeve, ai tha se janë siguruar akomodime në Fier dhe Vlorë, si në struktura shtetërore ashtu edhe në objekte hoteliere.
Sipas të dhënave zyrtare, janë evakuuar 20 persona në Bishan dhe 15 familje në Ferras, të cilët janë strehuar në konvikte të gatshme. Ndërkohë, një pjesë e banorëve kanë zgjedhur të qëndrojnë në banesat e papërmbytura pranë zonës.
Kryetari i Bashkisë Fier, Armando Subashi, bëri të ditur se në orët në vijim pritet një përmirësim i situatës.